Mainit nga gin-abi-abi si Pope Francis sa Singapore nga amo na ang katapusan sa apat ka pungsod nga yara sa lista sang iya apostolic trip subong nga Septyembre 2024.
Apisar sang kahangawa sa ikaayong lawas sang 87-anyos nga Santo Papa, naga-guwa nga wala ini subong sang ginabatyag nga malain nga kondisyon kag malipayon pa nga nag-atubang sa mga Katoliko nga nagsug-alaw sa iya halin sa Indonesia, Papua New Guinea, kag Timor Leste.
Matapos ang pormal nga leaving ceremony sa airport sa kapital sang East Timor nga Dili, nag-abot ang Santo Papa sa Singapore kahapon sang hapon kun sa diin ginalauman nga makig-istorya ini subong nga adlaw sa leaders sang city state, mag-deliver sang state address, kag magpanguna sa misa sa national stadium.
Magatinir siya sa Singapore tubtub buwas antes magbalik sa Vatican nga amo ang magatakop sa iya pinakamalawig kag pinakamalayo nga byahe sa sulod sang 11 ka tuig nga pagpungko bilang Santo Papa.
Ang Singapore nga independent na halin sang 1965 amo ang isa sa pinakamanggaranon sa Asya apang ginamuno gihapon sang rights groups bangud sa kalala sang justice system lakip na ang pagpatuman sang death penalty.
Puluy-an ini sang Chinese majority kag Malay kag Indian minorities.
Ginabanta nga 30 percent sang Singaporeans ang Buddhist, 20 percent ang wala sang relihiyon kag ang nabilin amo ang Catholic, Protestant, Taoist kag Hindu.
