Sa negosyo, maintuan ka lang gani sa kantidad nga P1,000, indi ka na maributay bangud wala ma lang abi ginapamulot ang kuwarta.
Apang ano pa gid bi kun ang nadula sa imo milyun-milyon nga kantidad? Abaw daw malain gid ang imo sa panumdum kun paano mo ini bawion.
Ini man ang natabo sa isa ka appliance store sa China sang napierde ini sang kantidad nga masobra P236-million sa sulod lamang sang 20 minutos!
Natabo ini sa Little Swan Dongshan Franchise Shop ukon mas kilala nga Little Swan nga makit-an sa Jixi County sa probinsiya sang Anhui sa southeastern part sang China.
Sikat ini nga store sa pagbaligya sang locally-made washing machines kag iban pa nga appliances sa manubo lamang nga presyo.
Isa ka adlaw, nakit-an sang customers nga bagsak-presyo gid ang shop gani asud-asud ang pag-abot sang orders nga naglab-ot gilayon sa 40,000 units.
Pila ka minutos lang ang nagligad, nareyalisar na sang tag-iya sang shop kun ano ang sala.
Ang rason amo nga nagsala gali ang empleyado sa pagbutang sang presyo kun sa diin , halimbawa, ang original price nga P13K, ginhimo sini nga P2K+ lamang.
Nagpaguwa sang apology statement ang shop kag naghingyo sa mga nagbakal nga icancel na ang ila order kag irefund lamang sila.
Mangin ang empleyada nga nagsala ang nag-sorry man kag naghingyo sang pabor sa mga customer, bangud suno sa iya, kun siya ang pabayaron, kulang pa ang iya mga propiedad sa kuwarta nga iya nausik sa sulod lamang sang 20-minutos.
Gina-imbestigaran na subong sang local market supervision authority sang China ang sala sa pricing sang Little Swan.
Kun mahibaluan nga ginhungod sang appliance store nga himuon nga sala ang presyo sa washing machines para nga makaangkon sang online visibility o mapasaka ang ila benta, obligado sila nga ihatag ang orders sa mga nagbakal.
Apang kun mapamatud-an naman nga indi hungod ang amo nga sala, mahimo mag-file sang petisyon ang Little Swan sa korte para indi na legal ang purchase contract. Pwede sini mabalik ang bayad sang customer kag indi na pag-ideliver ang washing machine.
