Nakabalik na sa Pilipinas ang anay Queen of All Media nga si Kris Aquino matapos ang tinuig nga pagpuyo sa Estados Unidos sang Amerika para sa health treatment.
Nakumpirma ini sa official fan account ni Kris sa X (formerly Twitter) kun sa diin ginpakita sini ang airport view halin sa sulod sang eroplano kun sa diin iya ginsiling, “Touched down… hello Manila.”
Sang Huwebes, ginpahayag sang actress-host nga magapauli siya para suguran ang ikaduha nga immunosuppressant infusion nga patigayunon sa masunod nga sinemana. Gintawag man niya ini nga “fight of my life” kag kinahanglan niya ang suporta nga mahatag sang iya mga utod, pakaisa, kag mga abyan.
“Emotionally I need the encouragement and unwavering faith my sisters and cousins, closest friends, and trusted team of doctors can provide,” kabahin anay sang ginsapubliko sini. “Sadly what was the battle to improve my mental health is now the struggle to protect my vital organs. This is now the fight of my life.”
Anum ang iya nalista nga confirmed autoimmune conditions nga amo ang autoimmune thyroiditis, chronic spontaneous urticaria, Churg Strauss, systemic sclerosis, lupus, kag rheumatoid arthritis.
Magluwas diri, may ginahulat pa gid nga resulta sa duha ka dugang nga posible nga autoimmune conditions.
Sang Pebrero, gin-share ni Kris sa iya abyan nga host nga si Boy Abunda nga crucial period sa iya ang masunod nga anum ka bulan bangud may ginatilawan siya nga bag-o nga bulong para nga mapaayo ang kondisyon sang iya korason.
Ginpahayag man sini anay nga magaumpisa na sa pagtrabaho ang iya anak nga si Bimby paea nga makabulig sa iya medical bills.#
