Ang kada iloy makapanugid gid kun ano kabudlay ang eksperyensya kun sila ang nagabata.
Apang imagine kun ano kabudlay ini para sa mga nanay nga nagbata sa tion mismo sang emerhensya kaangay sang sunog.
Sang nagligad nga adlaw, natabo ang isa ka daku nga sunog sa residential area sa Tondo, Manila.
Nagsugod ang kalayo 11:00 sa aga sang Sabado kag nagmakot ini sa mga building nga may light materials kag madasig man nga naglapta pati sa kaiping nga mga komunidad.
Pasado ala una sang hapon sang amo nga adlaw, gin-raise na ang Task Force Bravo nga buot silingon malapit 30 na ka fire trucks ang kinahanglan.
Nakit-an man mangin ang helicopter sang Philippine Air Force (PAF) 505th Search and Rescue Brigade nga nagbulig, apang apisar sang pagbinuligay, 2,000 gid ka mga pamilya ang nawad-an sang puluy-an.
Sa tunga sining kasakuon, ginpatawag naman ang Philippine Red Cross (PRC) bangud may isa ka bata nga napilasan.
Nagresponde ang team kag samtang nagaparik-parik ang tanan sa sunog, isa naman ka 41-anyos nga babaye ang ila nakit-an nga manugbata na gid kag nagakinahanglan sang bulig.
Ginpasa sa lain nga crew ang pilason nga bata, kag wala man pagpangduha-duha ang Red Cross nga buligan ang nanay nga mapaguwa ang isa ka baby girl.
Sa subong, ang nanay kag ang baby ang pareho nga ginatatap sa Tondo Medical Center. Malipayon naman ang Red Cross nga samtang masako ang tanan nga luwason ang kabuhi sa sunog, may “new life” pa gid nga nagdugang sa kalibutan.
“As lives were being saved from the flames, a new life was born,” kabahin sang post sang Red Cross.#
