ILOILO CITY – Gindula sang Department of Public Works and Highways (DPWH) ang kahangawa sang publiko sa buho nga nakit-an sa asphalt overlay sa Ungka Flyover.
Sa interview sang Bombo Radyo kay Engr. Sanny Boy Oropel, Regional Director sang DPWH Region 6, iya ginpahayag nga ang buho sa mga aspalto ang tuga sang wala untat nga pag-ulan.
Suno kay Oropel, bangud nagatinir ang tubig, nagatuga ini sang potholes ukon pagbuho sang aspalto kag nagalala pa gid sa tion nga malabayan sang mga salakyan.
Ginpahayag sini nga normal lang nga nagakatabo ang nasambit nga depekto sa asphalt pavement sa tion nga may yara sang ‘excessive water’.
Gin-athag man sang natungdan nga ilisan man sa gihapon ang aspalto sa tion nga matigayon ang 2nd phase sang rectification sa Setyembre 22.
