Ginklaro sang Office of the Vice President (OVP) nga wala nagguwa nga ‘desperada’ si Vice President Sara Duterte kasunod sang pagbisita sini kay anay Vice President Leni Robredo sa Naga City, Camarines Sur.
Ginpaguwa ang statement matapos madamo gid ang nakibot sang sorpresa nga ginbisita ni Sara si Robredo apisar nga nahibaluan sang tanan kun ano ini ka-kontra sang iya amay nga si former president Rodrigo Duterte.
Suno sa opisina ni Sara, may abyan siya nga Bicolano nga nag-imbitar sa iya sa centennial anniversary mass sang Canonical Coronation of Our Lady of Peñafrancia. Ang amo man nga abyan amo ang nag-arrange sang casual meeting ni Sara kay former Vice President Robredo.
Gindugang man nga samtang yara sa Naga, nagpakigkita man si Sara sa iban nga prominente nga Bicol personalities kag nagtambong man sa misa.
“Vice President Sara Z. Duterte is excited to experience her first-ever Peñafrancia fiesta. She was invited by a Bicolano friend to attend the centennial anniversary mass of the Canonical Coronation of Our Lady of Peñafrancia on September 20. The same friend also arranged a casual meeting with former Vice President Leni Robredo,” kabahin sang statement.
“During her stay in Naga, Vice President Duterte visited several prominent Bicol personalities and heard mass with ordinary Bicolanos. She neither looked desperate nor distressed.”
Sa separado nga statement ni Robredo, ginsiling sini nga personal kag indi political ang ila gin-istoryahan.
“While she was in Naga City for the Penafrancia Festival, VP Sara Duterte took the opportunity to visit me at my home. The conversation we had was personal and not political,” suno sa anay bise-presidente.
Sa statement naman ni Barry Guttierez, former spokesperson ni Robredo, ginsiling sini nga gin-welcome ni Leni si Sara apisar nga ginpahibalo siya sa iya pagbisita minutos lamang antes ang pag-abot sini.
Naglawig sang isa ka oras ang ila pag-istoryananay apang wala sang detalye nga ginpaguwa kun ano ang ila topiko.
Interesante ini nga timing sang pagbisita ni Sara bangud sang nagligad lamang nga adlaw, ginpahayag sini nga indi sila mag-abyan ni President Ferdinand ‘Bongbong’ Marcos, Jr. kag “never again” nga mag-updanay sila sa eleksyon.
Matandaan nga tandem sanday Sara kag Bongbong sa idalom sang UniTeam sang 2022. Si Leni nga gina-suportahan naman sang Kakampinks amo ang ginkabig nga pinakadaku nila nga kasumpong sang amo nga tuig sang nagpadalagan man ini sa pagka-presidente.#
