Ginhatagan sang House of Representatives si Vice President Sara Duterte sang ulihi nga tsansa nga magtambong sa plenary-level budget deliberations, matapos nga wala ini nagpakita sa proceedings sa duha ka sunod-sunod nga adlaw.
No-show kahapon, Septyembre 24, ang vice president nga ginkadismaya naman sang mga mamalidha.
Ang iban nagpautwas sang kaugot nga ginpahulat sila sang bilog nga adlaw samtang may yara man sang nagpanawagan nga mag-resign na lang ini.
Suno kay House appropriations vice chairperson nga si Ako Bicol Rep. Jil Bongalon, kun indi na interesado sa iya katungdanan bilang Vice President, mas mayo nga magpanaog na lang sa pwesto si VP Sara.
Nahibaluan nga ang budget sang Office of the Vice President (OVP) ang orihinal nga gintalana nga diskusyunan sang Septyembre 23, apang ginsaylo kahapon bangud absent si Duterte.
Gin-reschedule ini subong nga Mierkules, ang ulihi nga adlaw nga may session ang kamara bag-o ang isa ka bulan nga break.
