ILOILO – Ginkumpirma sang Sangguniang Panlalawigan nga halos wala pa katunga sa mga banwa sa Iloilo ang nakakuha sang cash incentives para sa mga Barangay Tanod.
Sa interview sang Bombo Radyo Iloilo kay Iloilo 2nd District Board Member June Mondejar, chairman sang Committee on Public Order and Security, kag author sang Provincial Ordinance 2020-240 nga nagahatag sang incentives sa mga Barangay Tanod, iya ginpahayag nga sa 43 ka mga local government units, 16 pa lang ang nakabaton sang cash incentives.
Suno kay Mondejar, pila sa mga rason sang atrasado nga paghatag sang cash incentives amo ang mga masunod:
-sala ang spelling sang pangalan ukon proof of identity sa mga requirements ukon sa iban nga dokumento;
-ginadugangan sang iban nga barangay ang numero sang ila barangay tanod nga wala na nagasantu sa master list sang Department of the Interior and Local Government (DILG) rason nga ini ang ginabalik liwat sa barangay;
-barangay election sang Oktubre 30, 2023 sa diin may iban nga barangay nga ginpang-islan man ang mga barangay tanod.
Nagakadapat suno kay Mondejar nga antes magtakop ang Setyembre 2024, mahatag na ang mga cash incentives sang mga barangay tanod nga kuntani sang Disyembre 2023 pa nila nabaton.
Nagpangayo man bulig si Mondejar kay Liga ng mga Barangay President-Iloilo Province Ex-Officio Board Member Amalia Victoria Debuque nga pahibaluon ang Liga ng mga Barangay President sa mga banwa sa cash incentives sang mga Barangay Tanod.
Pahayag niya, bastante ang pondo sang probinsya bangud napainan na ini sang Provincial Government kag inughatag na lang.
Nahibaluan nga may yara sang anum tubtob 15 ka mga barangay tanod ang 1,721 ka mga barangay sa probinsya depende sa kadakuon ukon populasyon sang barangay.
Sa masterlist sang DILG, kabug-usan nga 15,395 ang barangay tanod sa probinsya sang Iloilo.
