Makapauli na sa Pilipinas ang anum ka Filipino seafarers matapos na-acquit sa kaso nga drug trafficking sa Türkiye.
11 ka bulan man nga na-detain ang mga Pinoy antes napamatud-an sa Ereğli Criminal Court sang Septyembre 16, 2024 nga inosente sila kag wala sang kahilabtanan sa iligal nga droga.
Base sa mandu sang Department of Foreign Affairs (DFA), ginaproseso na sang Philippine Embassy sa Ankara ang repatriation kaupod man sa Philippine Consulate General in Istanbul.
Ginpasiguro man nga yara sila sa maayo nga kondisyon kag mapasakay na pabalik diri sa Pilipinas.
Matandaan nga sang Oktubre 2023, ang anum ka Pinoy kaupod ang apat ka senior officers sa Panamanian-flagged cargo vessel nga Phoenician M ang gin-aresto bangud sa alegasyon sang drug trafficking samtang yara ang ila barko sa Ereğli Port sa Zonguldak nga nahamtang sa Black Sea region sang Türkiye.
Nagbulig ang Legal Assistance Fund sang DFA agud nga maproteksyunan ang kinamatarong sang mga Pinoy kag masunod ang due process.
Nagtingob-pwersa man ang mga abogado sang embahada kag legal counsel sang insurance company sang manning agency sa pagtambong sa tanan nga hearings sa korte sang Hunyo, Hulyo, kag Septyembre subong nga tuig tubtub nga dalayon nga nabasura ang kaso.
Samtang yara sa detention facility, ginsigurado man nga nahatagan ang mga Pinoy sang panapton, pictures sang ila pamilya, financial kag welfare assistance paagi sa Assistance-to-Nationals (ATN) Fund sang DFA. ‘
Ginsigurado man sang embahada nga regular nga ma-update ang ila pamilya sa Pilipinas sa dalagan sang ila kaso.
