Linibo ka mga tawo sa nagkalain-lain nga parte sang kalibutan ang nagmartsa sa mga dalanon agud ipanawagan nga untaton na ang gyera sa Gaza kag indi na pagdayunon ang pagpasangkad pa gid sang away sa Middle East.
Ginabanta nga 40,000 ka pro-Palestinian demonstrators ang nagguwa sa pagprotesta sa central London, samtang may mga nagtilipon man sa Paris, Rome, Manila, Cape Town kag sa New York City.
Mangin sa atubang sang White House sa Washington sa Amerika, may mga nagaprotesta man batok sa suporta sang Estados Unidos sa military campaigns sang Israel sa Gaza kag sa Lebanon.
Subong nga adlaw amo ang anibersaryo sang una nga sorpresa nga gin-atake sang Hamas militants ang southern Israel.
Kaagahon sang Oktubre 7 sa Israel sang nakasulod ng Hamas fighters, nagpangpatay sang 1,205 ka mga tawo nga kadam-an mga sibilyan, kag nagdala man sang ginatos ka mga bihag sa Gaza.
Apat ka mga Pilipino ang nalakip sa napatay lakip naman ang isa ka Ilongga caregiver nga tumandok sang Maasin.
Sa 251 ka mga bihag, 64 pa ang na-detain subong samtang 117 naman ang nahilway kag 70 ang kumpirmado nga nagkalamatay.
Sang amo nga tion, nagdeklarar na sang gyera ang akig nga prime minister sang Israel nga si Benjamin Netanyahu batok sa Hamas nga blacklisted bilang “terrorist” organization sa European Union kag sa United States.
Pagkatapos sang amo nga atake, wala na ginpadugay sang Israel kag gin-umpisahan na ang pagbomba sa Gaza.
Sang Oktubre 13, gin-abisuhan na ang mga sibilyan sa northern Gaza nga magkadto sa nabagatnan nga bahin sang Gaza strip. Ginbanta sang United Nations nga 2.4-million ka mga tawo ang nagtal-as sang amo nga tion.
Oktubre 27 sang naglunsar na ang Israel sang ground offensive.
Abril subong nga tuig sang nagsingki man ang away sang Iran kag Israel sang nagpaulan sang drones kag missiles ang Iran, samtang sang Hulyo naman sang nag-atake naman ang Israel sa Yemen bilang balos sa makamamatay nga strike sang Houthi rebels sa Tel Aviv.
Ang Houthi rebels amo ang responsable sa pagpang-atake naman sa mga barko sa Red Sea kag sa Gulf of Aden kun sa diin may nagkalamatay pa nga mga Pilipino.
Halin sang nag-ibwal ang gyera sa Gaza, naga-intra man ang Hezbollah militants nga nakabase naman sa Lebanon.
Bangud sa pagsingki man sang away kag kamatayon sang mga lider sang Hezbollah, ini naman subong ang ginatutukan sang Israel kag gina-intrahan man sang Iran bangud suportado sini ang amo nga militant group pati na ang Hamas kag ang Houthis.
Mangin ang mga Western countries ang nagapanawagan na kay Netanyahu nga untaton na ang gyera sa Gaza. Naakig prime minister sang nagpahayag ang France nga dapat nga untaton na ang pagdul-ong sang mga armas sa Israel.
Sabat sini, bisan buligan sila ukon indi sang iban nga mga pungsod, magadaog sa gihapon ang Israel.
“Israel is seeking to defend itself against those who fight against civilization, Israel is fighting against fanatism. Rest assured, we will fight until the battle is won, for our sake and for the peace and sake of the entire world,” kabahin sang statement ni Netanyahu.
As of press time, base sa record sang Gaza health ministry, masobra na sa 41,000 ka Palestinians ang nagkalamatay sa sulod sang isa ka tuig bangud sang pagtimalos sang Israel sa Hamas.#
RONALDO SCHEMIDT/AFP via Getty Images
