Gin-anunsyo sang Philippine Atmospheric, Geophysical, and Astronomical Services Administration (PAGASA) nga opisyal na nga nagtakop ang southwest monsoon ukon ang habagat season sa Pilipinas.
Suno sa weather bureau, sandig sa recent analyses, naghina na ang habagat kag nagbaskog ang high pressure system sa East Asia.
“Recent analyses showed a significant weakening of the southwest monsoon over the past few days. Moreover, strengthening of the high pressure system over East Asia has been observed…. With these developments, the southwest monsoon season has officially ended,” kabahin sang statement, Oktubre 7.
Ang habagat masami mabatyagan halin Hunyo tubtub sa Septyembre sa kada tuig.
Sa pagtakop sini nga season, may transition na sa northeast monsoon ukon sa amihan season apang ginalauman nga sa masunod pa nga sinemana igadeklarar sang state weather bureau ang pormal nga pagsugod sini sa Pilipinas.
Ang amihan masami naga-umpisa sa Oktubre tubtub sa Pebrero ukon sa Marso kag amo ang nagadala sang malamig nga hangin sa Pilipinas kag pag-ulan sa nasidlangan nga bahin sang pungsod.
Padayon man subong nga gina-monitor ang potensyal nga pag-develop sang La Niña sa tropical Pacific Ocean. Matandaan nga una na nga ginpahayag sang PAGASA nga may 71% nga tyansa nga maga-porma ang La Niña sa Septyembre tubtub sa Nobyembre 2024 kag magalawig tubtub sa Enero tubtub Marso 2025.#
(PNA photo by Avito C. Dalan)
