Apisar preseason pa lamang, nasaksihan na ang isa ka maragtason nga hampang sa National Basketball Association (NBA) sang nag-updanay sa court ang mag-amay nga sanday LeBron kag Bronny James.
Sanday LeBron kag Bronny ang labing-una nga father-son duo nga nakahampang sa NBA kag sa isa lang ka team sang nagsambuwa ang Los Angeles Lakers batok sa Phoenix Suns sa Acrisure Arena sa Palm Desert, California.
Daw kaangay nga regalo ini kay Bronny nga naga-selebrar sang iya 20th birthday sang naghampang ini sa sulod sang kuwatro minutos kaupod ang iya 39-anyos nga amay nga ginakabig basketball superstar kag top scorer pa sa liga.
Ini ang una nga preseason game sang four-time NBA champion kag 20-time All-Star kag nag-atubang pa sa iya anay teammates sa USA national team nga sanday Kevin Durant kag Devin Booker. Naka-skor siya sang 19 points sa first half kag wala na nakahampang sa second half.
Si Bronny naman nga may “James Jr.” sa iya likod ang nagtapos nga may zero points, two rebounds, kag four turnovers sa sulod sang 13 minutos. Ika-55 siya nga overall pick sa 2024 NBA Draft nga ginpatigayon sang Hunyo.
Sa sini nga preseason game, nalutos ang Lakers sa Suns, 118-114.
May apat pa ka preseason games ang Lakers kun sa diin sunod sini nga maatubang ang Milwaukee Bucks.
Patigayunon ang imbukada nga hampang sini sa regular season sa Oktubre 22 batok sa Minnesota Timberwolves sa Crypto.com Arena sa Los Angeles.
