Nagapanglakakaak na sa halos P300 ang presyo sang kada kilo sang luy-a sa pila ka mga mercado sa Pilipinas subong nga tuig, apang ginalauman nga magahagan-hagan ini subong nga bulan bangud sa pagsugod sa pag-abot sang imports.
Suno kay Agriculture assistant secretary kag spokesman Arnel de Mesa, 4,200 metric tons sa 13,725 MT sang ginger imports ang nakaabot na sa pungsod. Kadam-an sini suno kay De Mesa ang naghalin pa sa China.
Matandaan nga sang Septyembre 30 sang gin-aprubahan sang Bureau of Plant Industry (BPI) ang importasyon sang 50 MT sang luy-a halin sa Vietnam kag Indonesia agud nga mas madamo pa nga pungsod ang makuhaan sang Pilipinas sang amo nga produkto.
Pahayag ni De Mesa, indi man gid madamo nga luy-a ang na-import sang Pilipinas sa nagligad nga duha ka tuig.
Nagsaka ang demand subong nga tuig ilabi na sa industrial users partikular sa nagahimo sang herbal tea kaangay sang turmeric tea.
Naglala pa ang sitwasyon sa pagkapierde sang produksyon bangud sang mga bagyo kag epekto man sang El Niño phenomenon.
Sa subong lamang nga bulan, 450 MT sang dugang nga imports ang magasulod sa Pilipinas.
Dapat man suno sa agriculture official nga mas manubo lamang sa P100 ang kada kilo sang luy-a bangud kun magsobra, makabig na ini nga mahal.
Sa Metro Manila, nagatupa na ini sa P140 tubtub sa P300 per kilo.
Una naman nga ginplastar ni Agriculture Secretary Francisco Tiu Laurel Jr. nga napilitan lamang ang gobyerno nga mag-import sang luy-a bangud sa pagsaka sang presyo sini sa domestic market.
