Nakakita ka na bala sang bata nga daw palad lang kadaku?
Amo sini sang sitwasyon ni Baby Robyn nga ginbun-ag sang iya iloy sang Marso 2023 sang naga-edad pa lamang ini sang 23 ka semana kag duha ka adlaw. Buot silingon sina, lima ka bulan nga mas temprano siya nga nag-abot sangsa petsa nga amo gid kuntani ang inugguwa niya sa kalibutan.
Sang nabun-ag si Baby Robyn, abaw, 11 oz lang gid ukon 328 grams ang iya bug-at kag ang iya palad ang daw kaangay lang gid kadaku sa kuko sang tawo!
Apisar amo siya sini kadaku sang ginbun-ag sa Grange Hospital sa Torfaen sa Wales,Great Britain, wala gid nadulaan sang paglaum ang iya 34-anyos nga iloy nga si Chantelle kag 38-anyos nga amay nga si Daniel.
May fundraising nga ginhimo para sa treatment sang baby samtang nga ginabutang lang ini sa sandwich bag para nga matatapan ang iya vital organs.
Indi man ini mahapos para sa ila bangud gina-oxygen ang bata kag ginapakaon paagi sa tubo sa iya ilong kag baba, gina-monitor ang vital signs sa tanan nga tion, kag may 30 ka doses sang bulong kada adlaw.
Apang strong si Baby bangud makaligad ang anum ka bulan, nasaylo na siya sa paediatric intensive care unit sa Children’s Hospital tubtub nga napaguwa na sang Septyembre sa labing-una nga tion sa sulod sang 18 ka bulan.
Tuman ang kalipay sang mag-asawa nga normal sila nga magpamilya sa isa ka balay.
Daku na subong ang baby, blonde ang buhok, kag chubby na ang iya gawi, apang may may feeding tube pa ini gihapon sa ilong kag may oxygen tube sa iya nga baba.
Gin-ako sang ginikanan nga abi nila sang una, imposible na nga mabuhi pa ang bata.
Nadiskubre man nga may brain damage ini anum ka bulan matapos ang iya pagkabun-ag, apang nagapabilin nga positibo ang bana kag asawa bangud nakahibalo sila nga wala sang imposible kaupod ang ila baby Robyn.
May ginhimo man nga social media page nga “robyn’s rainbow story” para mabuligan man ang iban nga pamilya nga may kaangay nga sitwasyon, kag para nga makabulig man sa fundraising para sa mga equipment kag therapies para sa dalayon nga pag-ayo sang bata.#
