Nakahanda ang militar sang South Korea nga magbalos kasunod sang reports nga nagpadala na ang North Korea sang mga soldado sa border sang duha ka pungsod agud nga magpalupok kag magpasigabong pananglitan maglala pa ang tensyon bangud sang pagsulod sang drones sa Pyongyang.
Nag-ugat ini nga kumplikto sa akusasyon sang North nga nagpalupad ang South sang drones sa Pyongyang agud nga maghulog sang mga propaganda leaflets nga may unod nga mga “rumor”.
Nagpaandam man ang North nga kun maka-detect sila liwat sang bisan isa lang ka drone, igakonsiderar na nila ini nga deklarasyon sang giyera.
Una naman nanginwala ang South nga sila ang nagpadala sang drones kag may mga espekulasyon nga basi kun ang mga activist groups sa South ang may kahimuan sini.
Nagapanindugan naman ang North nga ang Seoul gid ang balasulon. Nag-anunsyo naman ini nga nagpadala ini sang walo ka artillery brigades sa border kag nagdugang man sang pwersa sa air observation posts sa Pyongyang.
Suno naman sa Joint Chiefs of Staff sang South, hugot naman ang ila monitoring sa sitwasyon.
Ginpahayag man sang unification ministry sang South nga ang mga drone ang possible ginpadala man mismo sang North agud nga mahimo nga excuse sa ila himuon nga mga pagpanggarit-garit.
