Nagpang-pito ang West Visayas State University (WVSU) La Paz sa Top Performing Schools sa October 2024 Physician Licensure Exam.
Base sa Professional Regulation Commission (PRC), napaidalom ini sa kategorya nga may 100 ukon masobra pa nga examinees nga may at least 80% nga passing percentage.
Sa 100 ka aspiring physicians nga nagkuha sang pasinawahan halin amo nga unibersidad sa Iloilo City, 87 ang nakapasar nga katumbas sang 87.00% nga rating.
Nagapanguna naman sa lista ang University of the Philippines (UP) Manila nga may 160 out of 165 nga nakapasar.
Suno sa PRC, 6,600 ka mga indibidwal ang nagkuha sang exam subong nga Oktubre apang 3,845 lamang ang nakapasar.
Rank 1 si Isaac Edron Orig sang Davao Medical School Foundation nga may 89.33%, ginasundan ni Rolter Lorenz Lee sang University of Santo Tomas (89.25%), Jerickson Rodney Cua sang UP Manila (89.17%), Nijell Potencioso sang Cebu Institute of Medicine (89.08%), kag Kiel Christian Alday sang UST (88.83%).
Nagpatas naman sa pang-anum nga pwesto sanday Ryan Delfin Encarnacion kag Martin Aaron Mamangon sang UP Manila (88.13%).
Ang nabilin sa Top 10 amo sanday Frances Dominique Ho sang UP Manila (88.00%), Anne Corine Ramos sang Far Eastern University-Dr. Nicanor Reyes Medical Foundation (87.83%), Christian Lloyd Loo sang CIM (87.75%), kag Chelseah Denise Torres sang UST (87.67%).
Natalana pa nga iga-anunsyo sang PRC ang petsa kag venue sang oathtaking ceremony.#
(Photos: WVSU, PRC)
