Sa pihak sang naagyan nga mga pagpamigos kaangay na lang sang pag-agaw sa ila ancestral lands, ginpamatud-an sang Ati Tribal Organization sa Boracay, wala ini nangin sablag agud magpadayon sa pagpangibabaw sa patag sang edukasyon.
Sa interview sang Bombo Radyo kay Dania Husto, estudyante sang Colegio del Sagrada Corazon de Jesus, iya ginpahayag nga ang ila komunidad sa Boracay ang ginabug-usan sang 59 ka mga pamilya kag 297 ka mga indibidwal.
Suno kay Husto, ang ila chieftain amo ang iya lola.
Ginpahayag sini nga pinaagi sa scholarship nga ginhatag sa idalom sang Marillac Grantees’ Scholarship Program, nahatagan sila sang kahigayunan nga maka-eskwela.
Ang ini nga programa suno sa natungdan ang nagahatag sang educational assistance sa mga pigado nga mga kabataan bilang mga working students.
Nagapati man ini nga kun may yara sila nga mga Ati sang tinapusan sa pagtuon, indi sila madali nga madaog-daog kaangay sang ila mga ancestors nga gin-agawan sang duta.
