Ginmanduan ni Agriculture Secretary Francisco Tiu Laurel, Jr. ang Bureau of Animal Industry (BAI) nga tutukan ang refinement sang protocols agud nga mapadasig ang roll-out sang African swine fever (ASF) vaccines matapos nakit-an ang maayo nga resulta sini sa pilot sites.
“We’re hopeful that impending changes to the vaccination protocol will finally fast-track the vaccine rollout and finally address our problem with this stubborn virus,” pahayag sini sa isa ka statement.
Sang nagligad nga bulan, sa Lobo, Batangas nga amo ang ground zero sang latest nga outbreak, masobra tatlo ka dosena nga baboy nga natublukan sang ASF vaccine halin sa Vietnam ang naka-develop sang bastante nga antibodies batok sa virus.
Una nga nakabakal ang ahensya sang 10,000 doses sang sini nga Vietnamese-developed AVAC live vaccines paagi sa emergency procurement sang Agusto bilang kabahin sang plano nga magpanagtag sang 600,000 nga vaccine doses.
Apang nakahibalo man si Tiu Laurel nga madamo gihapon nga backyard hog raisers ang naga-alang-alang nga mag-upod sa ASF vaccine rollout bangud sa negatibo nga impresyon kag bangud sa kahangawa nga basi kun ihawon ang ila sagod nga baboy kun makit-an sa tests nga infected ini sang balatian.
Base sa latest nga data sang BAI kaangot sa ASF infection, as of October 2, may 30 ka mga probinsya sa 14 ka mga rehiyon sa pungsod ang may yara sang aktibo nga ASF cases.
Una nga natabo ang ASF outbreak sa Pilipinas sang 2019 kun sa diin suno sa DA, nabudlayan gid ang hog industry sa pagbangon sa tuman ka malala nga epekto sini sa industrya sang baboy.#
