Gin-anunsyo sang China nga magapatigayon sila sang live firing exercise sa Taiwan Strait subong nga adlaw, Oktubre 22.
Suno sa Maritime Safety Administration (MSA), ini nga “gun firing” ang matabo sa limited area nga malapit lang sa Chinese mainland coast kag ginabanta nga 105 kilometres (66 miles) halin sa Taiwan.
Suno sa Chinese authorities, indi pwede makaagi ang mga barko sa amo nga area halin 9:00 sa aga local time nga pareho lang sa oras sang Pilipinas.
Wala sini ginpatpat kun ano nga pwersa sang China ang magapanguna sa live firing kag kun ano ang ila tuyo.
Nahibaluan nga ang Pingtan amo ang pinakamalapit nga area sang mainland China sa Taiwan.
Wala ginapamuan sang Chinese Communist Party (CCP) ang Taiwan apang gina-claim nila nga kabahin pa ini sang ila teritoryo.
Sang nagligad nga weekend, matandaan nga naglabay sa Taiwan Strait ang warships sang US kag Canada bilang kabahin sang lihok sang Washington kag mga kaalyado sini nga ipakita nga isa ini ka international waterway. Ini man ang ginalantaw nga nagpa-init sa China nga nagtulod sa ila nga maghimo sang live firing exercise.
