Mangatubang sang reklamo nga frustrated homicide ang isa ka 19-anyos nga lalaki nga nagbuno sa duha ka mga pamatan-on sa Barangay Guinticgan, Carles, Iloilo.
Ang suspek amo si alias Edward, construction worker kag residente man sang amo nga barangay.
Ang mga biktima naman amo sanday alias Jessy, 18, residente man sang Barangay Guinticgan kag si alias Rex, 15, residente sang Barangay Tarong sa amo nga banwa.
Sa interview sang Bombo Radyo kay Police Major Sonny Boy Garnace, hepe sang Carles Municipal Police Station, iya ginpahayag nga nagsugod ang gamo sa baylehan sa People’s Village sa amo nga lugar.
Ginaalegar nga may indi-paghangpanay nga natabo bangud sa grupo-grupo, kag sang nagguwa ang mga biktima agud magpauli, ginbanggaan ini sang suspek.
Isa sa mga biktima ang napilasan sa wala nga bahin sang dughan, samtang ang isa naman ang gin-operahan sa ospital sa Pototan bangud sa samad malapit sa iya kinatawo.
Ginapahayag nga yara sa impluwensya sang makahulubog nga ilimnon si alias Edward sang nahimo sini ang krimen sang ala una sang kaagahon sang Oktubre 20.
Nagapabilin ini subong sa kustodiya sang mga pulis sa Carles Municipal Police Station.
