Yara na sa maayo nga kahimtangan ang mga sakay sang duha ka mga motorbanca nga una gin-report nga na-missing sa banwa sang Carles, Iloilo.
Una nga gin-report nga nadula sang Oktubre 22 ang MB Joyce and Jayzel apang nabaton sang PCG-Coast Guard Sub-station Carles ang impormasyon alas-8 na sang gab- i sa amo man nga adlaw kun sa diin may sakay ini nga sanday Joecy Bordan Jr., 22-anyos, residente sang Barangay Buaya-Sicogon, Island, Carles, Iloilo kag Boni Barrios, 19-anyos residente sang Barangay Gogo, Estancia, Iloilo.
Sa interview sang Bombo Radyo kay Petty Officer 1st Class Mark Tuble, commander sang Coast Guard Substation- Carles, iya ginpahayag nga nagpadulong ang duha sa Cabugao Island agud magkuha sang kasag agud ibaligya kuntani apang wala na sila nakabalik.
Suno kay Tuble, subong gid lamang nga aga, na-rescue ini sila sang MB Solid Marine nga nagalabay sa amo area padulong sa Manila.
Sa pihak nga bahin, nakit-an man ang isa pa gid ka baroto nga na-missing sang Oktubre 21.
Ini amo ang MB Divine nga sakay sanday Roman Mahilum, 32-anyos; Jonard Bantillo, 22-anyos; kag Raffy Badayus, 22-anyos kag lunsay mga residente sang Barangay Tinigban, Carles, Iloilo.
Suno sa impormasyon, yara na ini sila sa paghinakop sang barangay officials sang Sitio Borongon, Barangay Ara, Milagros, Masbate.
Nagpasalig man ang PCG-Coast Guard Sub-station Carles nga mapakig-angot sila sa mga biktima agud mapapauli sa Carles.
