Wala pa man nakaguwa sa Philippine Area of Responsibility (PAR) si Bagyo Kristine apang nagpalangkalaak na sa P9.75-million ang balor sang kahalitan nga nabilin sini sa sektor sang agrikultura.
Suno sa latest bulletin sang Department of Agriculture (DA), masobra na sa 230 ka mga mangunguma kag masobra 200 ektarya sang duta nga pang-agrikultura ang nahalitan nga may volume sang production loss nga 598 metric tons.
Nagsugod naman ang ahensya sa pagpatigayon sang price monitoring sa posible nga mga pagbag-o sa presyo sang agricultural commodities.
Yari ang lista sang available interventions/aid ukon assistance packages:
- Agricultural inputs kaangay sang bugas, mais, vegetable seeds, drugs, kag biologics para sa livestock halin sa DA Regional Field Offices 3, 4-A, 4-B, 5, 8, kag 13;
- Tubtub sa P25,000 halin sa Survival and Recovery Loan Program sang Agricultural Credit Policy Council nga mahimo mabayaran sa tatlo ka tuig nga may zero interest
- Indemnification sang insured affected farmers paagi sa Philippine Crop Insurance Corporation
Una na nga nagpahanumdom ang ahensya sa mga mangunguma nga anihon na nga daan ang gulang na nga mga tanum agud nga indi matam-an sa halit nga dal-on sang bagyo.
Si Bagyo Kristine amo na ang ika-11 nga nagsulod sa Pilipinas subong nga tuig.
