Paga-updan sang superstar singer nga si Beyoncé si Democratic US presidential candidate Kamala Harris sa rally sa Houston, Texas subong nga adlaw.
Isa ka majority Republican state ang Texas apang magakampanya diri ang vice president kaupod si Democratic Senate candidate Colin Allred kag natalana nga mangin topiko ang abortion rights.
Nahibaluan nga may yara sang layi nga gin-implementar sa Texas sang Septyembre 2021 nga naga-ban sang abortion matapos ang anum ka bulan kag ginatugutan man ang bisan sin-o nga kasuhan ang abortion patients kag ang mga nagabulig sa ila.
Santo sa reports, kaupod ni Beyonce — tumandok sang Houston — ang iya iloy nga si Tina Knowles kun magkadto na sa kampanya.
Antes sini, masami nga ginagamit ni Harris ang kanta sang celebrity nga “Freedom” bilang iya nga campaign rally song kag amo man ang ginpatukar sa national Convention sang Agusto.
Kilala man si Beyonce nga masami naga-endorso sa Democratic presidential candidates.
Sang 2016, nag-perform siya kaupod ang iya bana nga si Jay-Z sa rally nga para kay Hillary Clinton.
Ginsuportahan man sini ang Democratic candidates lakip sanday former President Barack Obama sang 2008 kag 2012, President Joe Biden sang 2020.
Ang iban pa nga singers nga naga-suporta kay Harris amo sanday Taylor Swift, Bruce Springsteen, Eminem, Cher, Marc Anthony, Lizzo kag Neil Young.
Si former President Donald Trump naman ang nakabaton sang endorsements halin sa well-known personalities lakip sanday Tesla founder Elon Musk, former Indycar driver Danica Patrick, actor Jon Voight, celebrity chef Paula Deen, former NFL star Brett Favre, actor Kelsey Grammar kag singers Kid Rock kag Kanye West.
Nagkampanya man subong nga adlaw si Trump sa Austin, Texas kag natalana nga magkadto sa Michigan nga isa ka battleground state.
