Maila sa gihapon ang Miss Grand International crown sa Pilipinas.
Sa finals sang 2024 edition kagab-i, nagtapos ang Filipina beauty queen nga si Christine Julianne “CJ” Opiaza bilang first runner-up sa kumpetisyon.
Nagpangibabaw naman sa 68 ka iban pa nga mga kandidata ang tiglawas sang India nga si Rachel Gupta nga amo ang nagsubli sa korona ni Luciana Fuster sang Peru.
Sa pihak nga bahin, nagpangatlo naman sa kumpetisyon ang 18-anyos nga si Thae Su Nyein sang Myanmar; si Safiétou Kabengele sang France ang third runner-up; samtang si Talita Hartmann sang Brazil ang fourth runner-up.
Suksok ni CJ kagab-i ang slinky silver cutout column gown nga himo sang Filipino designer nga si Mak Tumang.
Magluwas sa iya signature pasarela ukon pageant walk nga nagpabilib gid sa mga tumalan-aw, dalayawon man si CJ sa final Q&A kun sa diin “giyera” ang iya sabat sang ginpamangkot sa pinaka-kritikal nga isyu sa kalibutan subong nga kinahanglan nga solusyunan.
Nahibaluan nga tubtub subong, wala pa sang Miss Grand International title ang Pilipinas. Ang pinakataas nga Filipino contenders amo sanday Nicole Cordoves kag Samantha Bernardo nga pareho nga first runner-up sang 2016 kag 2020, samtang si Roberta Tamondong ang isa naman sa fifth runners-up sang 2022.
