Ginapabaloran sang isa ka manunudlo ang pag-develop sang critical thinking skills sang mga estudyante.
Ini sa tunga sang mainit nga isyu natuhoy sa artificial intelligence ukon A.I. nga kaangay nga ginasaligan na sang mga estudyante agud mangin mahapos para sa ila ang paghimo sang mga tasks sa eskwelahan.
Sa interview sang Bombo Radyo kay Miss Annie Dela Cruz, faculty sang Nueva Valencia National High School sa Guimaras, iya ginpahayag nga apisar madamo ang bentaha sang Artificial Intelligence, wala nagakadapat nga 100% nga mangin dependent diri ang learners.
Suno kay dela Cruz, bilang manunudlo, importante nga mangin maid-id sa paglantaw sang outputs sang mga estudyante kag hatagan sang feedbacks.
Pahayag niya, wala man dapat ginatolerar ini sang manunudlo.
Sa iya eksperyensiya, mas maayo nga ginaprangka ang mga estudyante ilabi na kun nahibaluan niya bilang manunudlo nga produkto sang Artificial Intelligence ang output sang learner.
Paathag niya, paagi sini, mas maengganyo ang estudyante nga maninguha kag gamiton ang iya kalam kag abilidad kag indi lang magdepende sa Artificial Intelligence.
