Nagpanaog na sa pwesto bilang head sang Chinese Basketball Association (CBA) ang NBA legend nga si Yao Ming bangud napigawan gid ini sa performance sang national team.
Pito ka tuig nga gin-uyatan sang former Rockets star ang amo nga posisyon apisar nga nag-retiro na siya sa paghampang sang basketball sang 2011.
Base sa interview kay Yao sa state news agency nga Xinhua, nag-resign siya bangud wala gid nakalab-ot sa “expectations” ang performances kag mga resulta sang hampang sang national team.
Antes sini, pila ka beses na nga kritikal ang 44-anyos sa men’s national team kag gintawag pa sini anay ang ila players nga “slackers” kag nagpahayag man nga malayo sila katama sa pinakamaayo nga teams sa kalibutan.
Sang wala sila nakasulod sa 2024 Paris Olympics, una man nga ginpahayag ni Yao sang nagligad nga tuig nga akuon niya ang bug-os nga responsibilidad.
Sunod man nga ginkumpirma sang CBA ang paghalin sini sa pwesto kag nagpaathag nga ginhimo ang desisyon matapos ang “careful consideration and based on considerations for the development of China’s basketball and personal planning.”
Antes ini nga development, duha ka magkasunod nga interesante nga hampang nga nagkitaay ang China kag ang Gilas Pilipinas nga ginsundan gid sang Pinoy basketball fans.
Sang FIBA World Cup 2023, ginlutos sang Gilas ang China, 96-75, nga amo lamang ang isahanon nga kadalag-an sang Pilipinas sa tournament. Nanguna ang Utah Jazz kag Filipino-American star nga si Jordan Clarkson nga may 34 points sa amo nga kadalag-an nga una man nga daog sang Pilipinas batok sa China sa senior level sa FIBA-sanctioned tournament halin sang 2014 FIBA Asia Cup.
Pagkasunod nga bulan, liwat nga nahuy-an ang China sa atubang mismo sang Chinese fans sang ginlutos sila liwat sang Gilas Pilipinas sa semifinals sang men’s basketball sa Asian Games. Nagbangon ang Gilas halin sa 20-puntos nga abanse, kag ginpasulod ni Justin Brownlee ang tres 24 segundos ang nabilin sa hampang nga amo ang nagpabor sa Pilipinas, 77-76, tubtub nga nakasulod ini sa finals kag dalayon nga nakuha ang gold medal sa Asiad.#
