Nagsaka na sa 158 ang naisip nga patay bangud sa flash floods sa Espanya partikular sa rehiyon sang Valencia.
155 sa sini nga death toll ang naghalin mismo sa Valencia samtang ang tatlo naman ang narekord sa Castilla-La Mancha kag Andalusia.
Padayon pa ang paghulag sang emergency teams para makit-an ang mga missing kag ginatos man nga mga soldado ang ginpadala sa rehiyon para mag-assist sa mga operasyon.
Wala ginsapubliko sang otoridad kun pila pa ka mga tawo ang ginapangita apang una na nakapahayag ang defense minister nga posible magsaka pa gid ang numero sang patay bangud indi pa subong maagyan sang rescuers ang iban nga mga dalan.
Akig man ang mga tawo sa apektado nga mga lugar bangud ginapahayag nga wala sang ginpadala nga mobile phone alerts kag nabaton lamang nila ini sang mataas na ang lebel sang tubig-baha kag pila ka oras pa matapos nga nag-isyu ang national weather service sang red alert bangud sa indi kinaandan nga mamunog nga pag-ulan.
Nag-umpisa naman ang pag-half mast sang mga hayahay sa government buildings kag isa ka minuto nga paghipos sa bilog nga nasyon bilang kabahin sang gindeklarar nga three days of mourning kasunod sang nasambit nga kalamidad.
