Ginbuksan na ang convention center sa Espanya bilang panibag-o nga temporaryo nga morgue para nga matatapan ang numero sang mga patay sa flash floods nga subong naglab-ot na sa masobra 200.
202 sa sini nga mga napatay ang naghalin sa eastern region sang Valencia kag ang tatlo ka iban pa ang nagikan naman sa Castilla La Mancha kag Andalusia.
Madamo pa ang missing kag may areas pa sa Valencia nga wala pa nasulod sang otoridad gani ginalantaw nga mas magasaka pa ini nga death toll.
Ini nga numero sang patay ang halos nagatupong na sa 209 nga napatay sa Romania sang 1970 kag ginakahangaw-an nga basi kun maglebel pa sa natabo sa flash floods incident sa Portugal sang 1967 nga nagpatay sang malapit 500 ka mga tawo.
Yara man sa lima ka gatos ka mga soldado ang todo-pangita sa mga missing samtang nagabuligay naman ang mga residente sa pagpangpala sa ila palibot para matinluan ang mga higko nga ginbilin sang lapnagon nga baha.
75,000 pa subong ka mga balay sa amo nga rehiyon ang wala pa gihapon nabalikan sang suplay sang kuryente.
Matandaan nga katumbas sang isa ka tuig nga ulan ang nagbubo sa sulod lamang sang walo ka oras sang Martes sang gab-i sa amo nga rehiyon sa Espanya nga nagpangguba sang mga taytay, dalan, naglapaw ang tubig sa mga suba, kag naglulutaw kag nagsalampaw ang mga salakyan.
