Nasugpon na ang tudlo kag nakabalik na sa trabaho sa West Philippine Sea ang Philippine Navy service member nga isa anay sa mga biktima sang pagpang-harass sang China Coast Guard (CCG) sa Ayungin Shoal sang Hunyo 17.
Suno kay Armed Forces of the Philippines (AFP) chief Gen. Romeo Brawner Jr., sa bulig sang mga doctor kag partners sang militar, nabalik ang nautod nga tudlo ni Seaman First Class Underwater Operator Jeffrey Facundo.
Matandaan nga natabo ang insidente sang ginbungguan sang CCG vessel ang rubber boat sang Pilipinas sang mapatigayon kuntani ini sa resupply mission sang Hunyo.
Suno pa kay Brawner, bangud maayo na ang kondisyon ni Facundo matapos ang surgery duha ka bulan na ang nagligad, nagbalik naman ini sa trabaho sa West Philippine Sea.
Matandaan nga kasunod sang amo nga insidente, nag-demand ang AFP nga dapat magbayad ang China sang P60-million nga damages kag dapat man ibalik ang ginpangkawat nga mga armas nga dal-on kuntani sa tropa sang militar sa BRP Sierra Madre.
Duha gid ka rigid-hulled inflatable boats kag navigational and communications equipment ang nahalitan bangud sa mga Chinese.
Tubtub subong, wala sang sabat ang China sa gina-demand sang Pilipinas.
“We will demand it. We will continue to demand it because it is our right. They were the ones at fault. They stole our equipment, and they should return it,” suno kay Brawner. “The P60 million doesn’t even include the damage caused to our Navy personnel who lost his finger.”
Gina-insister sang China nga dapat nga pahalinon na sang Pilipinas ang ginbutang sini nga barko nga BRP Sierra Madre sa Ayungin Shoal, bangud suno sa ila, kabahin ini sang “gentleman’s agreement” sang tion sang Duterte administration.
Nagapanindugan naman ang Pilipinas nga wala sang kinamatarong ang China sa Ayungin Shoal bangud nahamtang ini sa sulod sang exclusive economic zone kag continental shelf sang Pilipinas base sa 1982 UN Convention on the Law of the Sea kag sa 2016 arbitral award.
