May pila naman ka mga tuyo nga magtuga sang gamo kadungan sang Election Day sa lain-lain nga states sa Estados Unidos sang Amerika.
Sa Michigan, arestado ang isa ka lalaki matapos nagpamahog nga magahimo sang pagpang-atake pananglitan magdaog sa pagkapresidente si Republican candidate Donald Trump.
Suno sa Department of Justice, ang gindakop amo si Isaac Sissel, 25, residente sang Ann Arbor sa amo nga state nga nagpadala sang alleged threat sa FBI National Threat Operations Center sang Nobyembre 2.
Natabo naman ang pag-aresto sa iya sang FBI sa adlaw mismo sang eleksyon.
Sa Fowler, New York, dakop man ang isa ka lalaki matapos nagpamahog nga sunugon sini ang polling site samtang nagapadayon ang election.
Suno sa New York State Police, na-convict anay ang lalaki bangud sa felony, kag ginpaathag sa iya nga indi siya pwede makaboto ilabi na bangud wala siya nakaparehistro liwat matapos nakaguwa sa presuhan.
Nagpangakig ini kag didto na nagpamahog nga sunugon ang lugar ukon magbalik nga may dala nga armas.
Nalagyo ini sang ulihi apang nadakpan sang state police, gindala sa estasyon, kag mahimo pasakaan sang kaso.
Samtang, sa Washington, DC, arestado man ang isa ka lalaki nga may dala nga sulu kag flare gun sang nagtuyo ini nga magsulod sa Capitol Visitor Center.
Wala sang session ang U.S. House of Representatives kag ang U.S. Senate sang natabo ang insidente.
Sandig sa post sang department, nadakpan ang lalaki sa screen process sang na-notisyaran sang officers nga nagapanimaho ini sang fuel.
Sang gin-check, didto na nakit-an ang sulu kag ang flare gun.
Bangud sini, temporaryo nga gin-untat ang tours sa center kag gina-imbestigaran pa ang motibo sang lalaki.
Ginpasaka na ang security precautions sa bilog nga district lakip ang gintukod nga temporary fencing sa palibot sang White House, Eisenhower Executive Office Building sa Capitol complex kag sa Naval Observatory nga amo ang ginapuy-an sang vice president.
Samtang, gina-imbestigaran sang United States intelligence officials ang email account nga nagagamit sang Russian internet domain bilang potensyal nga ginhalinan sang ginaalegar bomb threats kadungan sang election day sa state sang Georgia.
Wala naman sang kumpirmasyon ang American officials kun halin gid man sa Russia ang ginpang-email nga threats.
Ginalantaw sang mga imbestigador ang history sang mga aktibidad sang email account agud matumod kun sin-o ang yara sa likod sini.
Ini nga non-credible threats ang nag-resulta sa temporary closure sang polling places sa Union City sa guwa sang Atlanta suno sa Fulton County police.
