Ginapadasig na sang Department of Information and Communications Technology (DICT) ang pagtinguha para sa ambisyoso nga National Fiber Backbone (NFB) program agud makompleto ang proyekto sang isa ka tuig nga mas temprano sa orihinal nga target.
Suno kay DICT Secretary Ivan Uy, target sang ahensya nga makompleto ang National Fiber Backbone sa 2027, isa ka tuig nga mas temprano sa 2028 original target, matapos naka-secure sang $288-million loan halin sa World Bank.
Sang Abril, nakompleto sang gobyerno ang first phase sang National Fiber Backbone paagi sa deployment sang 1,245-kilometer cable network nga nagakonekta sang 28 nodes halin sa Laoag City, Ilocos Norte, pakadto sa Quezon City,nga nagasakop sang Northern kag Central Luzon, Metro Manila, kag apat ka Bases Conversion and Development Authority (BCDA) ecozones.
Ini naka-deliver sang inisyal nga 600 GigaBytes per Second nga optical capacity.
Ang deployment naman sang phases 2 kag 3 ang ginahimo na kag makompleto sa tunga-tunga sang 2025.
Katuyuan sang ahensya nga maghatag sang government-owned high-speed fiber network, nga maka-provide sang public internet access para sa mga government agencies, public institutions, kag mga komunidad.
