Ginpasakaan na sang kaso ang tatlo ka mga tawo nga naangot sa kamatayon sang 31-anyos nga British singer kag former One Direction star nga si Liam Payne.
Tanan ini nga indibidwal ang naangot sa pag-provide sang drugs sa singer.
Ginatudlo ang hotel employee nga amo ang nagdul-ong kay Payne sang cocaine sang duha gid ka beses samtang yara sa hotel kag ang alleged drug dealer nga ginapatihan nga naghatag man sang duha ka beses antes ang kamatayon sang musician.
Ang ikatatlo nga tawo amo ang gin-akusaran sang “abandonment of a person followed by death.”
Wala ginhingadlan kun sanday sin-o ang involved apang direkta sila nga pahibaluon sang otoridad kag indi pwede nga makaguwa sa Argentina.
Naghatag man sang kumpirmasyon ang Argentine prosecutors nga naka-consume si Liam sang cocaine, alcohol, kag prescription antidepressant antes ini nahulog sa balkonahe sang ikatatlo nga panalgan sang hotel sa Buenos Aires sang nagligad nga Oktubre 16.
Sa autopsy, natukiban nga nagsuprer ini sang “multiple traumas” kag “internal and external hemorrhaging” bangud sa pagkahulog halin sa mataas nga lugar.
Nadala naman pauli ang bangkay ni Liam sa Britanya matapos ang tatlo ka semana nga delay.
Miyembro si Liam sang English-Irish pop boy band nga One Direction ukon ID nga natukod sa London sang 2010 kaupod sanday Niall Horan, Harry Styles, Louis Tomlinson, kag Zayn Malik.
Isa ini sa highest-grossing live acts sa kalibutan apang natabo ang indefinite hiatus sang 2016.
Isa ka semana matapos ang kamatayon ni Liam, nagbalik sa UK charts ang lima tanan ka albums sang boy band.
Ang ila third album nga Midnight Memories ang amo ang nanguna sang nagsulod sa chart sa number 13 nga may sales kag streams nga nagsaka 517% week-on-week suno sa Official Charts Company.
Tatlo man sa ila singles ang nagsulod liwat sa Top 40 samtang ang final solo single ni Liam nga Teardrops ang nakasulod man sa chart sa labing-una nga tion nga yara sa number 85.#
