𝗜𝗟𝗢𝗜𝗟𝗢 – Napaidalom sa Revised Penal Code (RPC) ang kaso nga mahimo atubangon sang driver sang pick-up truck nga nakabunggo-patay sa mag-asawa kag sa ila anak sa Barangay Canas, San Dionisio, Iloilo.
Ang mga biktima amo sanday Artemio Arabe, 64, Rosemarie Asupra, 58 kag ila anak nga si Angelie, 15, lunsay residente sang Barangay Cubay, San Dionisio, Iloilo.
Ang driver naman sang pick-up truck amo si Tomy Clarito, 26-anyos nga negosyante kag residente sang Calinog, Iloilo.
Sa interview sang Bombo Radyo kay Atty. Noel Palomado, iya ginpahayag nga kaso nga reckless driving resulting in property damage and multiple homicide ang mahimo atubangon sang suspek.
Suno kay Palomado, sa idalom sang Article 365 sang Revised Penal Code, ang reckless imprudence ang nagakahulugan sang “voluntarily, apang wala sang malisya nga paghimo sang akto nga naguba sa propedad.
Kun ang reckless imprudence naman ang nagresulta sa kamatayon, mahimo ang suspek nga magpangatubang sang kaso nga reckless driving resulting in property damage and multiple homicide.
Ginpahayag sini nga ang isa ka indibidwal nga ginpasakaan sang nasambit nga kaso ang nagakadapat nga magpaidalom sa legal proceedings agud matumod ang ila salabton.
Magadepende naman sa korte kun ano kalawig ang mangin penalidad kag kadugayon sang itinir sa presuhan sang suspek.
Magluwas diri, mahimo pa gid ini nga magbayad sang multa sa diin ginabase man ini sa halit nga natuga sa propedad kag sa mga biktima.
Magluwas sa criminal penalties, mahimo man nga mangin civilly liable ang suspek sa diin nagakadapat nga bayaran sini ang gasto sa medical treatment, funeral costs, ukon pagkaayo kag pag-ilis sang damaged property.
Matandaan nga nakagwa ang driver sang pick-up truck bangud nag-lapse na ang reglementary period sini kag wala maka-file sang kaso ang himata sang mga biktima.
