Handa nga mag-assist ang Philippine National Police (PNP) sa International Criminal Police Organization (Interpol) pananglitan may yara sang arrest warrant nga idagdag batok kay anay Presidente Rodrigo Duterte.
Ginpahayag ini ni PNP spokesperson BGen. Jean Fajardo matapos ginhangkat ni Duterte ang International Criminal Court (ICC) nga umpisahan ang imbestigasyon sa ginaalegar nga crimes against humanity sang ginpatuman ang drug war.
Suno kay Fajardo, apisar former president si Duterte, indi ini special case nga dapat handaan bangud kun naga-request ang Interpol sang assistance suno sa iya, ihatag ini sang pulis kaangay man sa bulig nga ginahatag sang foreign counterparts.
“If a warrant of arrest is issued and the Interpol asks us for assistance, then the PNP is bound by the security protocol with respect to assistance to be provided with our foreign counterparts,” suno kay Fajardo.
Matandaan nga sang Agusto, ginklaro ni Justice Secretary Jesus Crispin Remulla nga bisan indi na miyembro sang ICC ang Pilipinas, parte gihapon ini sang Interpol.
Una man nga ginplastar sang tiglikom nga dapat mag-agi anay ang Interpol sa court system sang pungsod antes sini madagdag ang arrest warrant halin sa ICC.
“There are existing mechanisms in terms of security assistance. There is no need to prepare for it because the mechanisms already work,” dugang sini.
Pahayag pa sini, indi ini ang una nga bes nga maga-extend sang assistance ang Pilipinas sa foreign counterparts sa pagdakop sa individual subjects partikular na ang red notices nga gina-isyu sang Interpol.
Nahibaluan nga ang red notice amo ang request sa law enforcement sa bilog nga kalibutan nga pangitaon kag arestuhon ang isa ka tawo nga wanted sa naga-request nga pungsod ukon international tribunal.#
