Nagsaka na sa pito ang kumpirmado nga napatay samtang tatlo naman ang nakaluwas sa landslide sa Barangay Labang sa Ambaguio, Nueva Vizcaya nga ginaangot sa anay Super Typhoon Pepito.
Base sa Provincial Disaster Risk Reduction and Management Office (PDRRMO), nasapwan na ang lawas sang mga biktima nga naga-edad duha ka tuig kag 18-anyos nga mga babaye, kag lima ka mga lalaki edad 16, 14, 13 kag 12-anyos.
Nakaluwas naman ang 40-anyos nga babaye, isa ka apat ka tuig nga bata, kag isa pa gid ka lalaki.
Suno kay Nueva Vizcaya Gov. Jose “Jing” Gambito, natabo ang pagtiphag sang duta bangud sa mabaskog nga ulan dala sang bagyo.
Magadeklarar man ang probinsya sang state of calamity para sa relief kag recovery efforts matapos nagkalaguba ang mga establisyemento, mga taytay kag dalan, kag daku nga halit ang ginbilin sa kaumhan.
Ini nga record ang wala pa naga-reflect sa gina-uyatan subong sang Office of Civil Defense (OCD) nga una na nag-report nga wala sang reported fatalities nga naangot sa anay Super Typhoon Pepito.
Kahapon sang nagguwa ang Pepito sa Philippine area of responsibility.
Ini ang pang-16 nga bagyo nga nakasulod sa PAR subong nga 2024 kag pang-apat sa bulan pa lamang sang Nobyembre.
Sa latest report naman sang PAGASA, ginsiling nga manubo ang tyansa nga may magasulod nga tropical cyclone sa Pilipinas tubtub sa katapusan sang masunod nga semana.
Base sa forecast sang state weather bureau, may tropical cyclone-like vortex nga posible maporma sa Tropical Cyclone Advisory Domain apang may manubo nga posibilidad nga mangin tropical cyclone sa tunga-tunga sang Nov. 25 tubtub sa Dec. 1.
Ginpahayag pa sang ahensya nga malayo pa katama sa Tropical Cyclone Advisory Domain kag wala pa sang epekto sa Pilipinas apang subject pa gihapon ini sa hugot nga monitoring.
