Pormal nga ginbaton sang Office of the Vice President (OVP) ang subpoena halin sa National Bureau of Investigation (NBI) sa Mandaluyong City subong nga adlaw, Nobyembre 26.
Ginhingyo sang NBI nga mag-atubang si Vice President Atty. Sara Duterte sa ila headquarters sa Manila sa Biyernes, Nobyembre 29.
Ini ang kaangot sa imbestigasyon sa mga reklamo nga grave threats kag posible nga paglapas sa Anti-Terrorism Act.
Una na nga ginhingyo sang NBI sa Facebook nga i-preserve ang video ni Duterte – sa diin ginpahayag sini nga nagkontrata siya sang tawo nga mapatay kay President Ferdinand Marcos Jr., First Lady Atty. Liza Marcos kag House Speaker Atty. Martin Romualdez – agud magamit nga ebidensiya.
Iserbe kuntani ang subpoena kay Duterte sang nagtambong siya sa hearing sang Kamara kahapon, Nobyembre 25, apang gab-i na sang nakaabot ang mga tinawo sang NBI sa Batasan Pambansa sa Quezon City, kag samtang nagapakig-angot saHouse Sergeant at Arms, nakahalin na ang Bise Presidente.
Gilayon man nga nagsabat si Duterte nga basahon anay niya ang subpoena antes magpagwa sang statement.
