Duha ka mga unibersidad sa Iloilo City ang nakakuha sang 100% nga passing rate sa bag-o lang ginpaguwa nga resulta sang November 2024 Philippine Nurses Licensure Examination (PNLE).
Ini amo ang West Visayas State University (WVSU) La Paz kag ang Saint Paul University-Iloilo.
Suno sa Professional Regulation Commission (PRC), 108 sa mga estudyante sa WVSU ang nagkuha sang pasinawan kag lunsay nakapasar samtang 110 naman ang nag-take halin sa Paulinians nga lunsay man nangin madinalag-on.
Ini ang nagbutang sa West kag Saint Paul sa Rank 1 sa Top Performing Schools kaupod sa siyam ka iban pa nga mga buluthuan sa Pilipinas.
Apat man ka mga estudyante sang WVSU College of Nursing-Batch Zephyr ang nakasulod sa lista sang topnotchers.
Rank 8 si Ma. Irish Himan Silvestre nga may 91% nga rating samtang Rank 9 naman sanday Robert Mathew Manzon Opong kag Karen Joy Sobusa Oscares nga pareho nga may 90.80% nga rating. Sa pihak nga bahin, Rank 10 naman si Richard Olano, Jr. nga may 90.60% nga rating sa pasinawan.
“A resounding congratulations to the WVSU College of Nursing for achieving a 100% passing rate and being hailed as the Top Performing School in the 2024 Philippine Nurses Licensure Exam! Your dedication, excellence, and unwavering commitment have once again proven that Basta Taga-West, The Best!,” post sang WVSU kasunod sang sini nga kadalag-an.
Ginkalipay man sang Paulinian community ini nga achievement. Facebook post sang eskwelahan: “Indeed, it’s a great day for all the Paulinians! To God be the greater glory. Congratulations St. Paul University Iloilo for the 100% passing rate in the 2024 Philippine Nurse Licensure Examination. The entire academic community is so proud of you!”
Suno sa PRC, kabug-usan nga 34,534 ang nagkuha sang exam sini nga Nobyembre kag sa sini nga numero, 29,349 ang nakapasar ukon katumbas sang 84.99%.
Ginpatigayon ang November 2024 PNLE sang November 9 to 10 sa nanuhay-tuhay nga testing sites sa bilog nga pungsod.
