Nagpanawagan ang International Criminal Court (ICC) kun mahimo magpakig-angot sa ila ang mga indibidwal nga may ihibalo sa mga krimen nga nakomiter sa idalom sang war on drugs sang anay Duterte administration.
Sa notice halin sa korte nga ginpaguwa pareho sa Filipino kag English, nag-apelar ang ICC sa posible nga mga testigo nga magpakigbahin sang impormasyon kaangot sa ginaalegar nga crimes against humanity nga natabo sa tunga-tunga sang Hunyo 2016 kag Marso 2019. Ginapahayag nga nalakip diri ang pagpamatay, torture, kag sexual violence.
Gin-address man sang ICC ang pag-apelar sini sa mga miyembro sang Philippine National Police (PNP) kag iban pa nga law enforcement agencies nga nangin kabahin sang drug war operations.
Naglunsar man ang korte sa The Hague sang website kun sa diin pwede nga anonymous nga maka-share sang impormasyon ang mga tawo nga interesado nga mangin testigo. Sa sini nga website, wala na sang gina-require nga pangalan, apang dapat nga i-fill out ang form nga may contact details lakip ang phone number kag email address.
Kinahanglan man nga i-specify sang witness ang iya affiliation — kun miyembro sila sang PNP, National Bureau of Investigation (NBI), Philippine Drug Enforcement Agency (PDEA), local government units, ukon sila ang biktima ukon nakasaksi sa krimen.
Dugang diri, nagapamangkot man ang ICC kun may gina-uyatan nga ebidensya ang witness — halimbawa, dokumento, video recording, ukon audio recording — nga naangot sa krimen.
Ginahingyo man sa website ang code word halin sa witness nga amo ang iga-provide sang ICC kasunod sang initial contact agud ma-verify nga naga-communicate sila direkta sa korte.
Ini nga tikang sang ICC ang ginhimo masobra duha ka semana matapos nag-atubang si former president Rodrigo Duterte sa Senado kag ginhangkat pa ang mga representatives sang korte nga magkadto sa Pilipinas kag imbestigaran siya kaangot sa drug war.
Una na nga ginklaro sang Philippine National Police (PNP) nga handa sila nga mag-assist sa INTERPOL kun may iga-execute nga arrest warrant nga gin-isyu sang ICC, apang gindugang man nga indi ini “special case” bangud himuon man nila ini bisan indi pa si Duterte ang involved.
Sa bahin ni President Ferdinand Marcos, Jr., ginsulit sini nga indi magkooperar ang Philippine government sa ICC investigation bangud nag-withdraw na ang pungsod sang termino ni Duterte, apang suno sa chief executive, indi man pagbalabagan ang imbestigasyon kun si Duterte na mismo ang gusto mag-atubang diri.
2018 sang nag-withdraw si Duterte sa Rome Statute nga amo ang treaty nga nag-establish sang ICC. 2019 naman sang nangin epektibo ang withdrawal. Ang pag-pull out sang former president ang natabo matapos naghimo ang ICC sang preliminary probe investigation sa iya drug war.
Sa House quad-comm hearing sini lang nga Nobyembre, nagpahayag si Duterte nga “silly court” ang ICC.#
