Nag-angkon sang nagkalain-lain nga mga reaksyon ang ginakabig nga ‘world-first law’ nga maga-ban sa mga kabataan sa social media sa Australia.
Suno kay Bombo Christine May Pastrana-Pulmones, international correspondent sa Australia, gin-aprubahan na ang hagna nga magadumili sa mga kabataan edad 16 anyos panubo nga maggamit sang social media.
Lakip sa mga nasambit nga social media platform amo ang TikTok, Instagram, Facebook, Snapchat, Reddit, kag X.
May yara naman sang isa ka tuig ang mga social media platform agud tun-an kun paano ipatuman ang ‘age restrictions’ antes dagdagan sang pamatbat.
Magadangat naman sa 50 million Australian dollars ukon P1.9 billion ang gintalana nga multa para sa ‘systematic failures’ sa mga platform.
Plano sang Australia nga magamit sang ‘age-verification system’ nga kinahanglan sang biometrics ukon government identification agud masigurado nga indi na makagamit ang mga kabataan sang social media.
Nagpahanumdom naman ang gobyerno sa nasambit nga pungsod nga wala sang exemption ang layi apisar nga may pahanugot ini sang mga ginikanan ukon may yara na sang daan nga mga account.
