Tinguhaan sang two-time Olympic medalist nga si Nesthy Petecio nga makasulod sa Los Angeles Olympics 2028 agud makuha ang iya ginahandum nga bulawan nga medalya.
Nagalaum si Nesthy nga sa 2028 na sini makumpleto ang tatlo ka mga duag sang medals matapos nabulsa sini ang silver medal sa Tokyo 2020 kag ang bronze medal sa Paris 2024.
Ang 32-anyos nga tumandok sang Davao Del Sur amo ang una nga Philippine boxer nga nakadaog sang medalya sa back-to-back Olympics.
Samtang malayo pa ang Olympiada, ginapreparahan anay ni Petecio ang world championships kag ang Southeast Asian Games.
Wala pa sang kasiguruhan subong kun malakip pa ang boksing sa masunod nga Summer Games. Wala sang boxing matches kun indi makakita ang International Olympic Committee (IOC) sang bag-o nga international boxing body sa 2025.
Apang suno kay Petecio, wala pa sang tinimok-timok halin sa iya National Sports Association kun madula gid man ang boxing gani nga hugot pa ang iya paglaum.
Base sa reports, ginpahayag ni IOC president Thomas Bach nga himuon sa 2025 ang desisyon kun malakip gid man ini nga hampang sa masunod nga Olympiada.
May yara subong sang World Boxing nga isa ka newly established international federation nga naga-preparar sa pag-bid para sa spot sang amo nga sports event sa quadrennial event. Sa pagkamatuod, nagahilapit na ini sa gina-require nga 50-National Olympic Committee (NOC) membership threshold. May yara na ini subong sang 37 members lakip ang Philippines, ang United States, Australia, kag Canada.
Ini nga international federation ang ginapangunahan sang Common Cause Alliance nga nagseparar sa Russian-influenced nga International Boxing Association (IBA) sang 2022.
