Ipaguwa na subong nga adlaw, Disyembre 13, ang resulta sang 2024 Bar Examinations.
Suno sa Korte Suprema, ipakita ang resulta sa LED walls sa sulod sang courtyard sang Supreme Court Main Building sa Padre Faura Street sa Manila.
Iga-upload man ini sa official website kag social media pages (X, Threads, Facebook kag Instagram) sang Korte Suprema.
Sang nagligad nga Septyembre, masobra 12,000 ang nagparehistro agud magkuha sang exam apang 10,490 examinees lamang ang nakakumpleto sa test nga ginpatigayon sa 13 testing centers sa bilog nga pungsod lakip na sa Central Philippine University (CPU) diri sa Iloilo City.
Covered sang Bar exams ang anum ka core subjects nga nagalakip sang Political and Public International Law, Commercial and Taxation Laws, Civil Law, Labor Law and Social Legislation, Criminal Law, kag Remedial Law, Legal and Judicial Ethics with Practical Exercises.
Una naman nga gin-anunsyo ni 2024 Bar Chairperson Supreme Court Associate Justice Mario Lopez nga patigayunon ang oath taking ceremony kag signing sang Roll of Attorneys para sa successful examinees sa Enero 24, 2025.
Sang nagligad nga tuig, yara lamang sa 3,812 out of 10,368 examinees ang nakapasar sa amo sini nga pasinawan nga 36.77 percent passing rate. Sang amo nga tion, si Ephraim Bie sang University of Santo Tomas ang nagpangibabaw.
Antes ini nga adlaw, may nauna nga anunsyo ang Supreme Court sang Lunes nga sensitibo nga personal information ang scores sang examinees kag covered sang Data Privacy Act. Buot silingon, indi ini mahimo mapaguwa nga wala sang pehanugot halin sa examinees.
Base sa news release sang korte, epektibo gilayon ang Guidelines on Requests for Disclosure of a Law School’s Bar Examinations Performance.#
(Photo: Filipino News)
