Gin-report sang Department of Agriculture (DA) nga may anum ka milyon nga mga bag sang bugas sa National Food Authority (NFA) nga natago na sang tuman ka dugay kag mahimo madunot na lang kun indi pa gid mapaguwa.
Kabahin ini sa ginplastar nga mga rason kadungan sang panawagan ni Agriculture Secretary Francisco Tiu Laurel Jr. sa Kongreso nga magpasar sang layi agud nga matugutan ang NFA nga magbaligya sang ila stocks sa mercado.
Suno naman kay Assistant Secretary kag spokesperson Arnel De Mesa, kun pwede kuntani ang NFA makabaligya sa mercado, pwede nila mahatag ang bugas sa presyo nga P30 kada kilo. Indi ini mahimo subong suno sa natungdan bangud ginkakas ang regulatory powers sang NFA sa idalom sang Rice Tariffication Law.
Sa idalom sini nga layi suno kay De Mesa, pwede lamang makabaligya ang NFA sang stocks sa Department of Social Welfare and Development (DSWD), Office of Civil Defense (OCD), kag sa local government units.
Mahimo man ini mabaligya sa Kadiwa stores apang kinahanglan nga may rekomendasyon anay nga himuon ang National Price Coordinating Council kag ipasa sa DA — halimbawa, kun tuman ang pagsaka sa retail prices kag kun may yara sang shortage sa suplay.
Problema naman ini suno pa sa natungdan bangud may panibag-o na naman nga harvest season kag kun indi ma-release ang stocks subong, mabudlay na para sa NFA nga maka-procure sang palay halin sa farmers bangud madamo pa ang reserba.
“To prevent the rice stocks from aging, we have the P29 program to release some of the stocks but the volume is not that big. We will have the next harvest season and if the stocks will not be released, it will be difficult for the NFA to procure (palay again from the farmers) because of so many stocks and this is where we will have possible problems,” suno kay De Mesa.
