Nakahibalo ka bala nga may trabaho nga makalot ka lang sang likod sang tawo apang bayaran ka sang linibo ka pesos?
May mga tawo abi nga nabudlayan magtulog kag lakip sa ila nga ginahimo amo nga ginapakalot nila ang ila likod para nga makapiyong-piyong sila kag mamu-ukan.
Amo ina ang rason kun ngaa natukod ang labing-una nga professional back-scratching service nga ginatawag nga The Scratcher Girls.
Ang nangin utok gid sini amo ang 55-anyos nga sio Toni George nga isa man sa mga tawo nga nanamian gid magpakalot sa iya likod gani nga ginasugo niya pati ang iya mga apo para nga himuon ini.
Sang ulihi, napinsaran niya nga wala siya naga-isahanon, gani, what if maghimo na lang siya sang back-scratching service kag pabayaron ang mga customer?
Amo gid sina ang natabo, apang antes gintukod ang The Scratcher Girls brand, madamo pa nga pagtuon ang ila ginhimo.
Propesyunal ini nga serbisyo bangud therapist ang nagahimo sini kag nagagamit sang iya kuko sa likod, limbs, scalp kag mangin sa dulunggan sang customer para nga maka-relax sila.
Light scratching kag tracing movements ang ginahimo sang therapist para mabuligan ang customer nga ma-release ang “endorphins” kaangay sang serotonin kag ma-connect ukon mabalanse ang “energy fields.”
Nagapanukot ang studio sang $130 ukon masobra P7,600 per hour para sa sini nga back-scratching kag tracing services.
Popular man ini sa US ilabi na sa ASMR community (autonomous sensory meridian response).
Ang tag-iya gid mismo kag ang iya therapists ang masami nagabyahe sa major metropolitan areas kaangay sang New York, Los Angeles kag Philadelphia agud nga mas madugangan pa gid ang ila nga mga customer kag mas mapakilala ang ila studio.
