Nagakinahanglan ang Department of Agriculture (DA) sang P300 million para magbakal sang 30 million doses sang bakuna batok sa avian influenza (AI) ukon bird flu agud nga mas mapabakod pa ang proteksyon sa local poultry industry.
Suno kay Agriculture Secretary Francisco Tiu Laurel Jr., ginapatigayon na subong ang trials kag kinahanglan ang pondo bangud natalana kuntani nga ipaguwa ang bakuna sa Marso sa masunod nga tuig.
Suno pa sa tiglikom, ang target sang bird flu vaccination drive ang amo layers ukon ang mga manok nga nagapangitlog.
Dugang sang opisyal, gina-formulate pa subong ang policy guidelines para sa pangbakuna.
Ginplastar man ni Tiu Laurel nga may diskusyon ang ahensya kaupod sa German pharmaceutical firm nga Boehringer Ingelheim kaangot sa bird flu vaccine.
Ini nga kumpaniya ang una nga nagpabutyag sang interes nga magsuplay sang kaangay nga bakuna sa Pilipinas. Amo man ini nga firm ang nagahatag sang bird flu vaccines para sa France sa Europa.
