Nagpahanumdom ang Office of the LGBT Affairs sang Iloilo City Government sa publiko nga kinahanglan mahangpan nga may limitasyon sa ano man nga aktibidad nga dapat huna-hunaon sa tanan nga tion.
May kaangtanan ini sa mga insidente nga narekord sang otoridad kun sa diin may yara sang mga indibidwal nga katapo sang LGBT Community nga gin-alegar nagahimo sang sekswal nga aktibidad sa Esplanade 3.
Sa interview sang Bombo Radyo kay Gab Umadhay, head sang Office of the LGBT Affairs , iya ginpahayag nga apisar nga gina-promote nila ang sex positivity, hugot naman nila nga ginapakamalaot ang ano man ng akto sang imoralidad kaangay sang paghimo sang sekswal nga aktibidad sa pampubliko nga lugar.
Suno kay Umadhay, importante man nga mahangpan sang publiko ang paghatag proteksyon sa ikaayong lawas bangud ini nga sahi sang mga aktibidad ang nagabutang sa ila sa risgo sa pag-angkon sang balatian nga resulta sang unsafe sex.
Dugang pa ni Umadhay, willing man sila manghatag sang libre nga condom apang kinahanglan nga sa pribado nga lugar nila himuon ang pagpakighilawas.
Matandaan nga sang damlag lang, naaktuhan gid sang isa ka street sweeper ang duha ka mga indibidwal nga lunsay lalaki nga nagahimo sang sekswal nga aktibidad.
