Nadepensahan sang Iloilo Science and Technology University (ISAT-U) Technobees ang ila record matapos liwat nga nakuha ang overall championship title sa Regional State Colleges and Universities Athletic Association (RSCUAA) VI 2024 Sports Festival.
Sa gin-release nga final and official medal tally, nakasaad nga nakatipon ang mga atleta sang ISAT-U sang 96 ka gold, 68 ka silver, kag 64 ka bronze medals agud nga madala-liwat pauli ang kampyonato.
Nagpangaduha ang Capiz State University (CAPSU) nga may 64 ka gold, 37 ka silver, kag 75 ka bronze medals, samtang nagpangatlo ang West Visayas State University (WVSU) nga may 61 ka gold, 45 ka silver, kag 63 ka bronze medals.
Antes ini nga sports festival, ang ISAT-U man ang overall champions sang RSCUAA 2020 kag 2023 kun sa diin ang host amo ang Carlos Hilado Memorial State University; amo man sa 2018 edition sa Northern Iloilo State University (NISU), kag ang 2017 nga hinampang nga ginpatigayon naman sa University of Antique.
Ang RSCUAA VI 2024 Sports Festival and Conference ginpatigayon halin sang Disyembre 15. Ginabug-usan ini sang 42 ka sports events nga ginhiwat sa 22 ka venues.
Maragtason ini bangud ini ang una nga tion nga nangin host ang Iloilo State University of Fisheries Science and Technology (ISUFST) kag katapusan nga tion nga nakaupod ang mga unibersidad halin sa Negros Occidental bangud sa napirmahan na nga Negros Island Region Act.
13 ka state universities halin sa anum ka mga probinsya ang kabug-usan nga nagpasakop sa sini nga aktibidad nga may tema nga “One Western Visayas: Promoting Peace, Inclusivity, and Well-Being through Sports.”
Sa closing ceremonies sa Tamasak Arena sa Barotac Nuevo, Iloilo, opisyal man nga ginpasa ang sulu sa NISU nga amo naman ang maga-serbe nga masunod nga host sang hinampang.
Photo: ISAT-U PIO
