Nagdangat na sa masobra 500 ka mga indibidwal ang nabiktima sang palupok kadungan sang selebrasyon sang New Year.
Sa latest data sang Department of Health (DOH), nadugangan sang 188 ang firecracker-related injuries nga na-report sang Disyembre 31, New Year’s Eve.
Tatlo man ka kaso ang narekord kahapon sang gab-i, Enero 1, samtang tatlo ka iban pa nga kaso ang ulihi na nga nadugang sa listahan.
Sa kabug-usan ang mga kaso nga narekord humalin sang Disyembre 22, 2024 tubtob Enero 2, 2025 ang nagdangat na sa 534.
Apang ini ang mas manubo sang 9.8% kun ipaanggid sa 592 ka mga kaso nga narekord sa kaangay nga period sang nagligad nga tuig.
Nagapanguna naman nga rason sang kapilasan amo ang kwitis nga isa ka legal nga palupok, apang delikado sa gihapon.
Magluwas sa kwitis kag boga, ang iban pa nga mga palupok nga nagtuga sang kapilasan sa mga biktima amo ang 5-star kag whistle bomb.
Kalabanan sa mga casualties ang lalaki nga nagadangat sa 443 sa diin kadam-an sa mga ini ang naga-edad sang 19 anyos panubo.
