Nagapakig-angot na ang otoridad sang Pilipinas sa mga counterpart sini sa iban nga mga pungsod agud maka-kolekta sang dugang nga impormasyon kaangot sa ginapatihan nga Chinese submersible drone nga nakit-an sa kadagatan nga sakop sang Masbate sang nagligad nga Disyembre 30.
Suno kay National Security Council (NSC) Assistant Director General Jonathan Malaya, maathag nga gingamit ang drone para sa reconnaissance kag surveillance gani importante nga mahibaluan kun sa diin ini halin kag kun ano ang ginahimo sini sa archipelagic waters sang Pilipinas.
Para sa NSC, tuman pa ka temprano subong nga makahimo sang konklusyon kaangot sa drone.
Base sa inisyal nga report, may yara sang marka nga HY-119 sa drone nga nagatumod sa Chinese underwater navigation kag communication system.
Gintugyan na ini sa Philippine Navy para sa dugang nga inspeksyon.
Sa Senado naman, nagpahayag si Sen. Francis Tolentino nga maga-file siya sang resolution para maka-imbestigar ang mga senador kaangot sa ginhalinan kag implikasyon sang presensya sang drone sa kadagatan sang Pilipinas. Hibaluon man sa hearings kun ang drones ang natuon sa Philippine Maritime Zones Act kag Archipelagic Sea Lanes Law nga naga-require sa foreign vessels nga maggamit sang designated sea lanes.
Sa nagligad nga tuig, nasaksihan ang mas agresibo nga aktwasyon sang China sa West Philippine Sea kag ginpabakod naman sang Pilipinas ang engagement sini sa Estados Unidos sang Amerika amo man sa Australia, Canada, France, Japan kag United Kingdom.
