Lakip ang mag-utod nga Pinay sa tatlo nga napatay bangud sa pagsigabong sang fireworks sa Honolulu, Hawaii kadungan sang pagsug-alaw sa New Year.
Ginkilala ini nga sanday Carmelita Turalva Benigno kag Nelly Turalva Ibarra.
Ang duha ka mga bata ni Carmelita, iya hinablos, kag ang iya tatlo ka tuig nga apo ang nasunog man kag subong yara pa sa ospital.
Ang ginhalinan sang pagsigabong amo ang ginatawag sang otoridad nga “cake” ukon ang cluster sang tubes nga may unod nga tubtub sa 50 aerial rockets.
Base sa inisyal nga reports, masobra ka 30 ka mga tawo ang nasamaran sa amo nga explosion apang natalana pa nga ipaguwa sang otoridad ang mga pangalan kag kun pila gid man ang nakaangkon sang injuries.
Ini man nga insidente ang ginakabig nga pinakamalala nga fireworks-related incident sa Hawaii sa sulod sang 14 ka tuig.
Padayon ang pag-monitor sang Philippine consulate general sa Honolulu sa sitwasyon kag nagapakig-angot man sa Honolulu Police Department.
