Gintumod sang otoridad nga wala sang kaangtanan sa terorista nga pagpang-atake ang pagsigabong sang Tesla Cybertruck sa guwa sang Trump hotel sa Las Vegas, Nevada, USA.
Sa baylo, ang nadiskubrehan sang mga imbestigador amo nga nagasuprer sang post-traumatic stress disorder (PTSD) ang 37-anyos nga decorated Green Beret nga si Matthew Livelsberger nga amo ang nagadala sang salakyan.
Miyembro ang natungdan sang elite US Special Forces kag naka-leave sa trabaho sang natabo ang insidente.
Gintiro sini ang iya kaugalingon sa mismo New Year’s Day sa sulod sang cybertruck nga puno sang fuel containers kag fireworks rason sang pagsigabong.
Pito ka mga tawo malapit sa hotel ang napilasan man kadungan sang hitabo.
Suno pa sa Federal Bureau of Investigation (FBI), may nakit-an sila nga duha ka sulat sa phone sang soldado kun sa diin ginpangbutang sini kun ano kabudlay para sa iya ang pagpatay kag iban pa nga mga isyu.
Ginklaro man nga bisan natabo ang insidente sa guwa sang hotel nga ginapanag-iyahan ni US President-elect Donald Trump, wala ini sang kaangtanan ukon kalain sang buot sa amo nga Republican leader.
Ginalantaw man sang FBI nga may mga isyu pa sa personal nga bahin kag sa pamilya nga mahimo nagtulod sa soldado sa pagpanginmatay.
Bangud sini nga imbestigasyon, gin-athag naman sang otoridad nga wala sang kaangtanan ang insidente sa Las Vegas sa pagpang-atake sa New Orleans, Louisiana kun sa diin isa ka US army veteran nga tampad sa Islamic State jihadist group ang nang-arado sang mga tawo samtang nagaselebrar sang New Year.
14 ang patay sa amo nga krimen. Patay man ang suspek sang nagbato ini sa mga pulis.
